Sunday, Oct 22nd

Last update05:45:10 AM GMT

தலைப்புச் செய்திகள்:
You are here: சமூக நோக்கு கட்டுரைகள்

கட்டுரைகள்

"பணி செய்வதே பணி" பணிப்புலம் அம்பாள் சனசமூக நிலைய கிராம முன்னேற்ற சங்கம் - 70ம் ஆண்டு நிறைவு விழா

E-mail Print PDF

Image may contain: 2 people, people sitting

பணிப்புலம் வாழ் மக்கள் பரம்பரை பரம்பரையாக இறை பணிக்காகவே தம்மை அர்ப்பணித்தவர்கள். வைகறையில் துயில் எழுந்து முதற் பணியாக மொட்டறாது மலர் பறித்து, பூமாலை புனைந்து இறைவனை அலங்கரித்து, பூஜையின் போது சங்குநாதம் செய்து, பண்ணோடு பாமாலை பாடி "இறைவனை பணி செய்வதே தம் பணி" என இன்றும் பணி செய்து வருகின்றார்கள். அவ்வூரில் பிறந்தமையால் நாமும் பெருமை அடைகின்றோம்.

தேவை எங்கு தேவைப்படுகின்றதோ அங்கு அதை பெற்றுக் கொடுப்பதே சேவை. எதிர் பார்க்காத நேரத்தில் தம் தேவையை பெற்றுக் கொடுப்பதும் சேவைதான். தேவை ஏற்படாத இடத்தில் சேவைக்கு வேலையில்லை.

சேவை-பணி என்பது எல்லோராலும் சுலபமாக செய்யக்கூடிய ஒன்றன்று. அதற்கு பல அற்பணிப்புகள், நற்பண்புகள், வசதிகள் தேவை. சேவை செய்வதற்கு மற்றைய உயிர்களிடத்து அன்பு, கருணை, மனிதநேயம் நிறைந்தவர்களாக இருத்தல் அவசியம். மனித குலத்தில் மாணிக்கங்களாக திகழ்கின்றவர்களில் மட்டுமே இவ் ஒளிக் கீற்றுகள் பிரகாசிக்கின்றன.

சேவை என்பது மானிட வாழ்க்கைக்கு இன்றியமையாத ஒன்றை இல்லாதவர்களுக்கும், அது தேவைப் படுகின்றவர்களுக்கும் ஈதல் அல்லது அதனை கிடைக்கச் செய்தல் என பொருள் பெறும். ஈகை என்பது தன் நலம் கருதாது பெறுபவர் நலன் கருதி வழங்குவதாகும். கொடுத்தல் என்பது ஈகையில் இருந்து வேறு படுகின்றது. உதவி செய்பவர் பெற்றவரிடம் இருந்து அதற்கு பதிலாக வேறு ஒன்றை எதிர் பார்த்துச் செய்வதாகும். இதனை

"வறியார்க்கொன்று ஈவதே ஈகைமற் றெல்லாம்
குறியெதிர்ப்பை நீர துடைத்து." என வள்ளுவர் கூறுகின்றார்..


இல்லாதவர்க்கு வழங்குவதே ஈகைப் பண்பாகும். மற்றவர்களுக்கு வழங்குவது என்பது ஏதோ ஓர் ஆதாயத்தை எதிர்பார்த்து வழங்கப்படுவதாகும்.

சாதி, மதம், குலம், இன பேதம் காட்டாது பெற்றோரால் கைவிடப்பட்ட பிள்ளைகள், பிள்ளைகளால் கைவிடப்பட்ட பெற்றோர், யாருமற்ற அநாதைகள், காசநோய் மற்றும் குஷ்டரோகங்களால் அவதிப்பட்டோரை நாடிச் சென்று அவர்களுக்கு தஞ்சமளித்து அவர்களின் பசியையும், பிணியையும் போக்கி தாயார்போல் உடன் இருந்து சேவை செய்த அன்னை திரேசா அம்மையாரின் சேவையும் தேவையானவர்களுக்கு வழங்கப்பெற்ற ஒரு மகத்தான பணியே.

இல்லறத்தில் நல்லறம் செய்து இப் பிறப்பின் நோக்கத்தை அடைய விரும்பும் ஒவ்வொருவரும் "அன்பும் அறனும் உடைத்தாயின் இல்வாழ்க்கை பண்பும் பயனும் அது" என்ற வள்ளுவன் கூற்றிற்கு அமைய இல்வாழ்க்கை பண்புடையதாகவும், பயனுடையதாகவும் விளங்குவதற்கு அன்பான உள்ளமும் அதையொட்டிய நல்ல செயல்களும் தேவை.

இங்கே அன்பு என்ற வார்த்தையையின் பின்னால் பல நற்பண்புகள் அடங்கி இருக்கின்றன. அன்பு இருக்கும் இடத்தில் பரிவு, இரக்கம் இருக்கும், இவை இரண்டும் இருக்கும் இடத்தில் பணிவு இருக்கும், இவை அனைத்தும் நிறைந்த இடத்தில் சேவை-பணி இருக்கும். பணி செய்யும் போது அறன் தானாக வந்து சேருகின்றது. எனவே இவ் மானிடப் பிறப்பின் பண்பும், பயனும் அதுவாகி விடுகின்றது.

1945ம் ஆண்டளவில் எம்மூரில் வாழ்ந்து கொண்டிருந்த (இளையோர்) பள்ளிப் படிப்பு முடித்தோரும், பல்கலைக் கழகம் முடித்தோரும், படித்துக் கொண்டிருந்தோரும், பெரியோர்களும் முதலில் புதினப் பத்திரிகைகள் வாசிப்பதற்காக வாசிகசாலை ஒன்றை அமைத்தனர். அதன் பின்னர் ஊர் மக்களின் ஒத்தாசையுடன்; முத்தமிழும், சைவமும், தமிழர் பண்பாடும், கலாச்சார விழுமியங்களும் வருங்கால எமது சந்ததியினர் மத்தியில் வளர்ப்பதற்காக, விரிவாக்கம் அடைந்து வளர்ந்த்தே “அம்பாள் சானசமூக நிலைய கிராம முன்னேற்றச் சங்கமாகும்.

அம்பாள் சனசமூக நிலைய கிராம முன்னேற்றச் சங்கம் கடந்த 70 வருட காலமாக செய்த நற்பணிக்கு கிடைத்த வெற்றியை ஊர்மக்கள் அனைவருடனும் கொண்டாடும் இந் நந்நாள் ஊரிலும், எமது சமூகத்திலும் பொன் எழுத்துகளால் பொறிக்கப்பெற வேண்டிய பொன்நாளே.

இந் நன்நாளில் அம்பாள் சனசமூக நிலையத்தை உருவாக்கி, வளர்த்தெடுத்த எம்மூர் பெருமக்களுக்கும் நன்றி கூறுகின்றோம்.

ஆக்கம்: கணபதிப்பிள்ளை கனகரத்தினம்
(ஓய்வு பெற்ற கணினி வலை பின்னல் இணைப்பு பரிபாலகர்)

பணிப்புலம், பண்டத்தரிப்பு

பணிப்புலம் கிராமமும் முத்துமாரி அம்பாள் வழிபாடும் - ஆய்வு செய்தவர்: ஆ. த. குணத்திலகம் ஓய்வு நிலை ஆசிரியர்

E-mail Print PDF

ஒரு ஆய்வுக் கட்டுரை எழுதுவதில் எவ்வளவு சங்கடங்கள் ஏற்படும் என்பதை நான் நன்கு அறிவேன். இங்கு பல விமர்சனங்களும் கேள்விகளும் எழலாம். எனினும் கேள்விகள் பிறந்தாலே உண்மையும் தெளிவும் கிடைக்கும். இதை அடிப்படையாகக் கொண்டே இவ் ஆய்வினை எழுதத் துணிந்தேன். எந்த விமர்சனங்களையும் ஏற்கத் துணிந்து கொண்டே எழுத முற்படுகின்றேன். எனவே இங்கு காணப்படும் தவறுகளைச் சுட்டும் போது அவற்றை ஏற்கவும் தயாராய் உள்ளேன் என்பதையும் தெரிவித்துக் கொள்கிறேன் .

சைவக் கிராமம்:
பணிப்புலம் கிராமம் ஒரு பூரண சைவ சமயிகள் வாழும் கிராமமாகும். அமெரிக்க மிசனரி மதம் பரப்பும் காலத்தில் இங்குள்ள விரல் விட்டு எண்ணக்கூடிய ஒரு சில குடிகள் மதம் மாறியது துரதிஸ்டமே. இருந்தும் இன்றும் பணிப்புலம் ஒரு பூரண சைவக் கிராமமாகவே இருக்கின்றது.

இக் கிராமம் மிகப் பழம் காலத்தில் தென் இந்திய வர்த்தகர்களான செட்டிமார் குலத்தின் பாரம்பரிய பிரதேசமாக இருந்ததாக கர்ண பரம்பரை வரலாறு கூறுகின்றது. இது இங்குள்ள பல ஆலயங்கள் அவர்களாலேயே அமைக்கப் பட்டுப் பரிபாலிக்கப் பட்டு வந்ததன் மூலம் அறிய முடிகிறது.

பணிப்புலம் என்னும் கிராமம் யாழ்ப்பான ராச்சியத்தை ஆரம்பித்து வைத்த முதல் மன்னன் விஜய காலிங்க (கூழங்கை )ஆரியன் காலத்தில் ஆரம்ப மானதெனக் கருத இடமுண்டு. இவன் இந்தியாவிலிருந்து இங்கு வந்த போது யாழ்ப்பாணத்தில் தமிழ்க் குடிகள் குறைவாக இருந்ததால் தனது ஆட்சிக்குத் தேவையான பல தொழில் சார் குலத்தவரை இங்கு அழைத்து வந்ததாக யாழ்ப்பாணச் சரித்திரம் கூறுகிறது. அவர்களில் ஒரு பகுதியினர் சைவ ஆலயங்களைப் பரிபாலிக்கவென இங்கு அழைத்து வரப்பட்ட ”வீர சைவ குலத்தவர்” என்பது யாழ்ப்பாணச் சரித்திர வாயிலாக அறிய முடிகிறது .

வீர சைவர்:
இந்தியாவில் சைவம் இடத்துக்கிடம் சில வேறுபாடுகளுடன் கடைப் பிடிக்கப் படுகிறது. இந்தியாவின் வடபகுதியில் காஸ்மீர் சைவம் எனவும், மைசூர் மாநிலமான கன்னடத்தில் "வீர சைவம்” எனவும், தமிழ் நாட்டில் சித்தாந்த சைவம் எனவும் வழங்கப்பட்டு வருகிறது. இந்த மைசூர் மாநில வீர சைவ குலத்தவரே தமிழ் நாடுமூலம் யாழ்ப்பாணம் வந்துள்ளதாக ஊகிக்க முடிகின்றது.

யாழ்ப்பாண மன்னன் காலிங்க ஆரியன் "வீர சைவன்" எனவும் அவன் வீர சைவர்களை இங்கு அழைத்து வந்ததாகவும் யாழ்ப்பாணச் சரித்திர நூல்களான "யாழ்ப்பாண மன்னர் பரம்பரை", "ஈழத்தவர் வரலாறு" என்பவற்றில் கலாநிதி. க. குணராசா அவர்கள் கூறியுள்ளார். எனவே இக்காலத்தில் வந்த வீர சைவர் யாழ்ப்பாணத்தின் பல்வேறு பகுதிகளிலும் குடியேறி இருக்கலாம். அவற்றில் ஒரிடமே பணிப்புலம் ஆக இருக்கலாம்.

பணிப்புலம்:
பணிப்புலம்    என்னும்    இப் பெயரை நாம் சற்று ஆழமாக ஆராய வேண்டியுள்ளது. பணி என்பது தொண்டு எனப் பொருள்படும். புலம் என்பது இடம் ஆகும். எனவே பணி + புலம் = பணிப்புலம் ஆகும். அதாவது தொண்டு செய்வோர் வாழும் இடமே "பணிப்புலம் " என்பதாகும். இதனாலேயே இவ்விடம் "பணிப்புலம்" என அழைக்கப் பட்டதாகக் கூறுவர். இவ்விடம் முற்காலத்தில் ஒரு சிறிய இடமாக இருந்திருக்கலாம். அதாவது பணிப்புலம் அம்பாள் ஆலயத்தைச் சூழவுள்ள சில குடிகளே "பணிப்புலம்" வாசிகளாக இருந்துள்ளனர் .

பண்டாரம்:
பணிப்புலம் என்பதை இன்னும் விளக்குகையில் இங்கு வாழ்ந்த வாழும் குலமான "பண்டாரம்" என்னும் குலத்துக்கும் இந்த இடத்துக்கும் பெயரில் நெருங்கிய தொடர்பு இருப்பதைக் காணலாம். "பண்டாரம்”, "பணிப்புலம்" ஆகிய இரண்டு பெயரும் ஒன்றோடொன்று தொடர்புடையனவாகும். "பண்டாரம்" என்ற சொல்லைப் பிரிப்போமானால், பண் -இசை, ஆரம் -மாலை என்பதாகும். பண் +ஆரம் =பண்ணாரம் என்பது இசை மாலையால் இறைவனை அர்ச்சிப்பவர்கள் என்பது அர்த்தமாகும். பண்ணாரம் என்பது பிற்காலங்களில் மருவிப் "பண்டாரம்" ஆனது எனக் கொள்வாரும் உளர். இது அவர்களின்  தொண்டு வாழ்க்கையைக் குறிக்கும் காரணப் பெயராகும்.

சாதியமைப்பு சமைய சம்பிரதாயங்கள் கடுமையாக நிலவிய அக்காலத்தில் "பண்டாரம்" என்னும் குலத்தினர் ஒரு மிக உயர்ந்த நிலையில் வைக்கப் பட்டனர் . "பண்டாரம்" என்பது "சிவனடியார்" என்றும் அதனால் இவர்கள் சிவனடியார் பரம்பரை எனவும் மிகவும் மதிக்கப் பட்டனர் .

பண்டார வாரியம்:
முற்காலத்தில் ஆலயங்களில் இன்று பரிபாலன சபை இருப்பதுபோல் "பண்டார வாரியம்" என்னும் சபைகள் இருந்ததாகக் கூறப்படுகிறது. இவர்கள் ஆலயம் சம்மந்தமான சகல நடவடிக்கைகளையும் கவனித்து வந்தனர். "பண்ணவன்" என்பது பாடகன் என்னும் ஒரு பொருளையும் உடையது. எனவே பண்ணவன் என்ற சொல்லும் "பண்டாரம்" என்ற சொல்லுடன் ஒத்துப் போவதால் பண்ணவனும் பண்டாரமாகி இருக்கலாம் எனவும் ஊகிக்கலாம்.

இவர்கள் ஆலையங்களில் தொண்டு செய்வதும் ,பாமாலை பாடுவதும், பூமாலை புனைவதும், சங்கு நாதம் ஒலிப்பதும் என தொண்டுக் காரியங்களில் ஈடுபடுத்தப் பட்டனர். இதற்காக ஆலைய வருவாயில் ஒருபகுதி இவர்கள் குடும்ப வாழ்க்கைக்கு நன்கொடையாக வழங்கப்பட்டு வந்தது. மற்றும் ஆலைய உற்சவ காலங்கள் திருவெம்பாவை போன்ற புண்ணிய காலங்களில் ஊரூராகச் சென்று இசையுடன் திருமுறை ஓதுவதும் சங்கு ஊதுவதும், அதன் மூலம் கிடைக்கும் அன்பளிப்புகளும் இவர்களின் வாழ்க்கையை ஒட்டின .

பண்டாராத்தியன்:
"பண்டாரம் "என்பதற்கு இன்னுமொரு பொருள் கொள்ளப்படுகிறது. "பண்டாராத்தியன் "என்னும் சொல் மருவிப் "பண்டாரம் "என வந்ததாகவும் கொள்ள இடமுண்டு. பண்டு -பழைய, முற்கால என்பதாகும். ஆராத்தியன் -வீர சைவப் பார்ப்பனன். எனவே பண்டு +ஆராத்தியன் = பண்டாராத்தியன் என்பது பழைய அல்லது முற்கால வீர சைவப் பார்ப்பனன் என்பது ஒரு பொருளாகும். இதன்மூலம் "பண்டாரம் "என்னும் குலம் முற்காலத்தில் பிராமணரில் ஒரு இருந்தமை தெரிய வருகிறது. பின்னர் இக்குலம் தனியே பண்டாரம் என்னும் பெயரைப் பெற்றிருக்கலாம் .

முத்துமாரி அம்பாள் வழிபாடு:
முத்துமாரி அம்மனைக் குல தெய்வமாகக் கொண்டு இவர்கள் ஊரூராகச் சென்று முத்துமாரி அம்மன் வேடம் தாங்கி கரகாட்டம் ஆடி மக்களைப் பக்தி நெறிக்குட்படுத்தினர். அவ்வகையிலேயே பணிப்புலம் முத்துமாரி அம்மன் வழிபாடும் தோன்றியதாக அறிய முடிகிறது. இக் கருத்துக்கு வலுச் சேர்க்க அளவெட்டி என்னும் இடத்திலுள்ள தவளகிரி முத்துமாரி அம்மன் ஆலையம் இக்குலத்தவர்களாலேயே அமைத்து வணங்கப்படுவதைக் காணமுடிகிறது .

இன்னும் இவ் ஆலயம் இருக்கும் இடம் ஆரம்பத்தில் ஒரு பன்னைக் காடாக இருந்ததாகவும் இங்கு வாழ்ந்த மிகப் பழம் குடிமகன் ஒருவர் கனவின் நிமித்தம் (பூசாரி குடும்பம்) அவரால் இவ் ஆலயம் அமைக்கப் பட்டதாகவும் பணிப்புலம் முத்துமாரியம்மன் ஆலய வரலாறு கூறுகிறது.

...சைவ சமயத்தின் ஒரு இருண்ட காலம்:
இலங்கையில் போர்த்துக்கீசர் காலம் இங்குள்ள சமயங்களின் இருண்ட காலமாக இருந்தது. புத்த சமயமும் சைவசமயமும் அழிக்கப்பட்டு கிறிஸ்த்தவ சமயம் பரப்பும் ஒரு அடக்கு முறைக் காலமாக இருந்தது. கி. பி 1505 ல் இங்கு வந்த போர்த்துக்கீசர் தம் மதம் பரப்புவதற்காக பெரும் அட்டூழியங்களைச் செய்தனர். இவர்களின் ஆட்சி கி .பி .1505 -1658 வரை இங்கு நிலவியது. இவர்கள் தமது மதத்தை இங்கு வலிந்து பரப்பினர். தென்பகுதியில் பெருமளவில் மதம் மாறினாலும் தமிலராட்சிக் குட்பட்ட பகுதியில் இவர்கள் ஆட்டம் பலிக்கவில்லை. அப்போது யாழ்ப்பாண மன்னனாக இருந்த சங்கிலியன் தீவிர சைவப் பற்றுடையவன். இவனின் உறுதியான சமயப் பற்று இங்கு எளிதில் கத்தோலிக்கம் புகுத்த முடியாதிருந்தது. மன்னார் பகுதியில் சில போர்த்துகீச பாதிரிமார் வலுக் கட்டாயமாக ஆயிரக் கணக்கானோரை மதம் மாற்றிய செய்தியை அறிந்த சங்கிலி மன்னன் பாதிரிமார் உட்பட மதம் மாறிய அனைவரையும் சிரச்சேதம் செய்வித்தான்

ஆனால் தமிழரின் சாபக் கேடு, கூடப்பிறந்த குணம் அன்றும் விடவில்லை. சகோதரப் பூசல் துரோகம் சங்கிலியனையும் 1621 ல் யாழ் வீரமா காளியம்மன் கோயிலடியில் போர்த்துக்கீசருடன் நடந்த கடும் சமரின்போது காட்டிக் கொடுத்து சங்கிலியன் சிறை பிடிக்கப் பட்டு கொல்லப்பட்டான். சங்கிலியன் மரணத்துடன் யாழ்ப்பாணத் தமிழரசு அஸ்தமித்தது. போர்த்துக்கீசரின் கொடுங்கோலாட்சி ஆரம்பமானது .

இக் காலத்திலேயே யாழ்ப்பாணத்தில் தீவிர மதமாற்றம் இடம் பெற்றது. மதமாற்றம் மட்டுமல்லாது சைவ சமய ஒழுக்கங்களுக்குப் பெருந் தடைகள் விதித்தார்கள். சைவ ஆலையங்கள் இடிக்கப்பட்டு அக் கற்களைக் கொண்டே கத்தோலிக்க தேவாலயங்கள் அமைத்தனர். அக் காலத்தில் சைவர்கள் தமது சைவ வழிபாட்டுக் கருமங்களை மறைந்தே செய்து வந்தனர். திரு நீறணிதல் வாழைஇலையில் உணவுண்ணல் போன்ற பல சைவ முறைகளுக்குத் தடை விதித்தனர். இதனால் சைவர்கள் தமது வீட்டுக் காணிகளில் மர நிழல்களில் சூலம் வைத்தே வழிபட்டனர். ஆலயங்கள் இடிக்கப்படுவதால் அங்குள்ள விக்கிரகங்களை பூசகர்கள் கிணறுகள் குளங்கள் முதலியவற்றில் இட்டு மறைத்தனர்.

செட்டிமார் குலம் வெளியேற்றம்:
போர்த்துக்கீசரின் அட்டூளியத்தில் நடந்த இன்னு மொரு பாதகமான செயல் "பசுவதை ". அதாவது ஒவ்வொரு கிராமத்திலும் உள்ள போர்த்துக்கீச தளங்களுக்கு அக் கிராமத்திலுள்ள மக்கள் நாள் தோறும் ஒரு மாடு உணவுக்காக வழங்க வேண்டுமெனத் தளபதியால் கட்டளை பிறப்பிக்கப் பட்டது. இதை விரும்பாத ,செய்ய முடியாத சுத்த சைவ ஆசால சீலர்களான செட்டிமார் பலர் குடும்பம் குடும்பமாக நாட்டை விட்டு வெளியேறித் தமிழ் நாட்டில் குடியேறினர். யாழ்ப்பாணத் தமிழரசர் செல்வாக்கில் பெரும் நிலச் சுவான்தார்களாக வாழ்ந்தவர்கள் தம் நிலபுலங்கள் அனைத்தையும் இங்குள்ளவர்களுக்கு விற்றும் தங்களால் பரிபாலிக்கப்பட்ட இந்து ஆலயங்களுக்குத் தர்மமாக எழுதியும் இன்னும் சிலர் இந்தியாவிலுள்ள சிதம்பரம் ஆலயத்துக்குத் தர்மசாதனமாக எழுதியும் சென்றனர்.

அவர்கள் வாழ்ந்த இக் கிராமத்து இடங்கள் அனைத்தும் பின்னர் பணிப்புலம் என்னும் பெரும் கிராமமாக விரிவடைந்தது. போர்த்துக்கீசர் காலம் முடிந்து கி .பி .1658 ல் ஒல்லாந்தர் ஆட்சி ஏற்ப்பட்டது. இக் காலம் ஓரளவு மதச் சுதந்திரம் ஏற்ப்பட்டாலும் சலுகைகளுடன் மதம் மாற்றும் முயற்ச்சி நடைபெற்றது. இதன் பின் கி. பி  1796 ல் ஆங்கிலேயர் ஆட்சி ஏற்பட்ட போது முற்றாக மத சுதந்திரம் ஏற்ப்பட்டு சைவர்கள் மீண்டும் சைவ ஆலயங்களை அமைத்து மறைத்து வைக்கப் பட்ட விக்கிரங்களை வெளியே எடுத்து சைவ சமய நெறியுடன் வாழ்ந்தனர் .

பன்னைப் புலம் ---
இருண்ட காலமான போர்த்துக்கீசர் காலத்தில் சைவர்கள் விக்கிரகங்களை ஒழித்து வைத்த இடங்களில் ஒரு இடமாக குறித்த பன்னைப் பற்றை இருந்திருக்கலாம். நீண்ட காலங்களுக்குப் பின் பூசாரி கனகருக்கு அம்பாள் காட்சி கொடுத்திருக்கலாம். இதனாலேயே பன்னைப்புல அம்பாள் எனப் பட்டிருக்கலாம். பின்னர் இக் குலப் பெயருடன் இணைந்து பணிப்புலமாக மருவியதாகவும் கூறப் படுகிறது .

எப்படி இருப்பினும் "பணிப்புலம்"என்பதர்க்குக் கூறப்படும் வெவ்வேறு காரணங்கள் பணி செய்யும் குலத்தினர் வாழ்ந்த இடம் என்பது உறுதியாகின்றது. சாதிய அமைப்பு முறைகள் மாற்ற மடியும் இக் காலத்தில் "பண்டாரம் "என அழைக்கப்படும் இச் சமூகம் மீண்டும் "வீர சைவர்"என அழைக்கப் படுகின்றனர் என்றும் பணி செய்யும் குலம் வாழ்ந்த இடமே "பணிப்புலம்"என்பதும் முடிவாகும் .


ஆய்வு செய்தவர்
ஆ .த . குணத்திலகம்
ஓய்வு நிலை ஆசிரியர்
அகில இலங்கை சமாதான நீதிவான் .
சாந்தை, சில்லாலை .

முதியோர்கள் ”அறளை” பெயர்தலுடன் உயிர் வாழுதல்(LIVING WITH DEMENTIA)

E-mail Print PDF

”அறுபதில் அறளை பேரும்” என்பதும், ”நாற்பதில் நாய்க்குணம் வரும்” என்பதும் எம்முன்னோர் அனுபவத்தால் தந்த முதுமொழிகள்.  வயது அறுபதை தாண்டிவிட்டால் நரம்பு தளர்ச்சி உள்ளவர்களுக்கு ஞாபகமறதி ஏற்படலாம். அத்துடன் அவர்கள் வேறு நோயினால் பீடிக்கப் பெற்று வாழும் நிலை ஏற்பட்டுவிட்டால் நிலைமை மோசமடைகின்றது. ஒருமுறை கூற வேண்டியதை பலமுறை கூறியும், மற்றவர்களில் செயலில் வெறுப்பைக் காட்டியும், எதற்கெடுத்தாலும் எரிந்து விழுவதுமாக பயித்தியம் பிடித்தவர்கள்போல் இருப்பார்கள். இதையே இளையோர் அறளை பேருதல் என்கிறார்கள். டாக்ரர்கள் இது ஒரு பருவ வருத்தம் என்கின்றார்கள்.

முதியவர்கள் அறளை பெயர்தலுடன் உயிர் வாழுதல் (LIVING WITH DEMENTIA)

மேற்படி தலைப்பிலான இக் கட்டுரையானது *சிரேஸ்ட உளநல மருத்துவர் Dr. திரு,பா. யூடிரமெஸ் ஜெயக்குமார், மட்டக்களப்பு.அவர்களால்* எழுதப்பட்டு,கனடா தமிழ் மருத்துவர் கழகத்தாரின் "நலம்தானா" சஞ்சிகையில் வெளிவந்ததாகும். இக் கட்டுரையை இணையங்களில் வெளியிட அநுமதி வழங்கிய கனடா வாழ் வைத்தியர் Dr. திருமதி. இ.லோகன் "அவர்களுக்கு எனது மனமார்ந்த நன்றியைத் தெரிவித்து, எமது மக்கள் பலருக்கும் முதியவர்களைப் பராமரிப்பதில் இருக்கின்ற சிரமங்களைக் கருத்திற்கொண்டு இக் கட்டுரையை இங்கு பதிவு செய்கி்ன்றேன்.

உலக சுகாதார ஸ்தாபனம் அறுபது வயதைக் கடந்தவர்களை முதியோர்கள் (Eiderly Adult) என்கிறது. உலகம் முழுவதும் 800 மில்லியன் மக்கள் இவ்வயதில் வாழ்கின்றனர். இத் தொகையானது 2050ம் ஆண்டளவில் 02 பில்லியன் வரை அதிகரிக்கலாம். எனவும் எச்சரித்துள்ளது. அப்போது முதியோர் ஏனைய வயதினரை விட அதிகளவில் உயிர்வாழ்வார்கள்.இம் முதியோர்களில் பல்வேறு உடல், உள நோய்கள் ஏற்பட்டாலும் அறளை பெயர்தல் (னுந‍அநவெயை) மிகப் பொதுவாகக் காணப்படும் ஒரு கூட்டு நோய்க்குறித் தொகுதியாகும்.

அறளை பெயர்தல் (DEMENTIA)
பொதுவாக வழக்கில் ஞாபக மறதி நிலையை "அறளை பெயர்தல்" என்கிறோம்.சிறு வயதில் ஏதாவது மறந்த ஒருவரை  "அறளை" என அழைக்கின்றோம். முதுமையில் இதுவொரு நோய் குறித்தொகுதியாக உருவெடுக்கும் போதுமுதியவர்களில் ஞாபகமறதி, சிந்தனை, பேச்சாற்றல்,நடத்தைக் கோளாறுகள், நாளாந்த செயற்பாடுகளான குளித்தல், உணவருந்துதல், உடைமாற்றதல், கழிவறைச் செயற்பாடுகள் என்பன பாதிக்கப்படுவதோடு அவர் மற்றவர்களில் தங்கி வாழவேண்டிய நிலை அல்லது பராமரிப்பதற்கு பிரத்தியேகமான அணுகுமுறை தேவைப்படுகின்றது.

அறளை பெயர்தலிற்கான பொதுவான காரணங்கள்
பின்வரும் நோய்கள் அறளை பெயர்தலை ஏற்படுத்துகின்றன. Alzheimer's Disease (55%), Vascular Dementia (20%), சில உடல் நோய்களும் + போதைவஸ்து பாவனையும் (10%) மீளக்கூடிய காரணங்கள் (15%), மூளையின் உட்புற குருதிப்பெருக்கு, விட்டமின்" B12" குறைபாடு என்பனவாகும். அறளை பெயர்தல் நோய்க்குருதித்தொகுதி உடையவர்களில் மூளையின் கொள்ளளவு நரம்புகளின் செயற்திறன் என்பன படிப்படியாகக் குறைவடைகின்றது.  (Neuro-Degenerative Syndrome) இவை மீள முடியாதவை.

மருத்துவ சிகிச்சைகள்
குறித்த நோயாளி பொது வைத்திய நிபுணர்களின் மருத்துவ பரிசோதனைகளிற்கு உட்படுத்தப்பட்டு, குணமாக்கக்கூடிய உடல் நோய்கள் இருப்பின் அவற்றைக் குணமாக்குவதன் மூலம் வயோதிபரை மீள் நிலைக்கு கொண்டு வரலாம். இங்கு மனச்சோர்வு,உளமாய நோய்கள் (Psychosis) மாநாட்டம் (Delirium) என்பனவும் அறளை பெயர்தல் போன்று காணப்படலாம்.

அறளை பெயர்தலிற்கான சிகிச்சை முறைகள்
இங்கு மருத்துவ, மருத்துவமற்ற முறைகள் கையாளப்படுகின்றன. அறளை பெயர்தலை குணமாக்க முடியாது. இருந்தபோதும் முதியவரின் சிந்தனைப் பகுதி (Cognitive) மேலும் பாதிப்படைவதை தவிர்ப்பதற்கான மருந்துகள் காணப்படுகின்றன. ஆரம்பத்திலேயே இனங்காணுதல், முறையான உடல், உள மருத்துவ நிபுணர்களின் வழிகாட்டலில் மருந்துகளைப் பாவித்தல், சுயமாக இயங்குதல்.வாசித்தல், பயனுள்ள பொழுது போக்குகளில் ஈடுபடுதல், குடும்பமாக வாழுதல், சமய, சமூக செயற்பாடுகளில் ஈடுபட வைத்தல் என்பன முதியவர்களில் அறளை பெயர்தலின் தாக்கத்தைக் குறைக்க உதவும்.

சிந்தனைப்பகுதி புத்துயிர்ப்பாக்கலிற்கு (Cognitive Enhancement), Tacrine,Donepezil,Rivastigmine,Selegilline,Vit-E என்பன பாவனையில் உள்ளன.

உளமாய நோய்கள், அலைந்து திரிதல் என்பனவற்றுக்கு குறைந்தளவில் (Rispendone,Olangapine,Qutapine என்பன பாவிக்கப்படுகின்றன.

உலகம் முழுவதும் அறளை பெயர்தலுடன் 35,6 மில்லியன் மக்கள் உயிர் வாழ்வதாக அறியப்பட்டுள்ளது. இத்தொகை 2050ம் ஆண்டளவில் 115,4 மில்லியனாக அதிகரிக்கும் என அறியப்பட்டுள்ளது.

அறளை பெயர்தலிற்கான பராமரிப்பு முறைகள்
அறளை பெயர்தலை குணப்படுத்த முடியாது.தவிர்க்க முடியுமான முயற்சிகள் தோற்றுப்போனால் பராமரிப்பு என்பது அவர் உயிருடன் இருக்கும் வரைக்கும் செய்யவேண்டியது. ஒரு குழந்தையைப் பராமரிப்பது என்பது தாயாருக்கே தெரியும்,ஆனால் முதுமையில் ஏற்படுகின்ற அறளை பெயர்தல் நோய் குறித்தொகுதியால் பாதிக்கப்பட்டவரை பராமரிக்கும் பக்குவம், பொறுமை,சகிப்புத்தன்மை, என்பன சாதாரணமானதல்ல.பெரும்பாலான மக்கள் இவ்வாறு பாதிக்கப்பட்ட முதியவர்" நடிக்கிறார்" என தண்டித்த சந்தர்ப்பங்களையும் அறிந்துள்ளோம்.

ஒரு குடும்பத்தில் கணவன், மனைவி உயிருடன் இருந்தால் அதில் ஒருவருக்கு ஏற்பட்டால் மற்றவர் ஏனைய குடும்ப உறுப்பினர்களுடன் சேர்ந்து உதவ முடியும்.இங்கு கூட்டுக் குடும்ப வாழ்க்கை முறை,சமூக ஆதரவு எனபன பராமரிப்பாளர்களிற்கு உதவியாக அமையும்.சில வேளைகளில் அறளை பெயர்தலுடன், பார்வைக் கோளாறு, பாரிசவாதம், மூட்டு வாதம், கேளாமை போன்று ஒன்றுக்குப் பல பிரச்சினைகள் ஒரு முதியவரில் காணப்பட்டால் பராமரிப்பாளர்கள் மிகவும் களைப்படைந்து விடுவார்கள்.

தற்போதைய காலகட்டத்தில் தனிக்குடும்பம்,கணவன்,மனைவி இருவரும் வேலைக்குச் சென்றால் தமது பெற்றோருக்கு அவர்கள் உதவி செய்யக்கூடிய நிலைமை காணப்படாது.

மேற்கத்தைய நாடுகளிலும்,வளர்முக நாடுகளிலும் முதியவர்களுக்கென இளைப்பாறல் கிராமங்கள், தனியான விடுதிகள்,பராமரிப்பு இல்லங்கள் காணப்படுகின்றன.இலங்கையில் இவை இன்னும் பேச்சளவிலேயே உள்ளன.எதிர்காலத்தில் இவை ஆரம்பிக்கப்பட வேண்டும்.

அறளை பெயர்தல் நோயினால் ஏற்படும் தீவிர நடத்தைக் குழப்பங்களைக் கையாள்வதற்கான நடைமுறைக் குறிப்புகள்.

* நாளாந்தம் நிறைவேற வேண்டிய காரியங்களை வரிசைப்படுத்தி பட்டியல் ஒன்றைத் தயார்செய்து வைத்துக்கொள்ளுங்கள்.எதையெதை எந்த நேரத்தில் எப்படிச் செய்ய வேண்டும் என்பதை இதன் மூலம் நீங்கள் அறிந்து வைத்திருப்பதால் இது உங்களது வாழ்வை மிக இலகுபடுத்தும்.

* முடியுமானவரை அவ் வயோதிபரை சுதந்திரமாக இருக்க விடுங்கள்.உதாரணமாக இந்நோயால் பாதிக்கப்பட்ட பலர் சுறுசுறுப்பின்றி உறுதியில்லாதவர்களாக இருப்பினும்,தமது உணவை தாமாகவே உட்கொள்ள இயலுமானவர்களாகவே இருப்பர்.

* அவர்களுக்கும் தன்மானம் உண்டென்பதை ஒருபோதும் நீங்கள் மறந்துவிடக்கூடாது.அவர் இருக்கும்போது அவரைப்பற்றி எதிர்மறையாகப் பேச வேண்டாம்.

* அவருடன் வாக்குவாதப்படுவதையும், முரண்படுவதையும் தவிர்த்துக்கொள்ளுங்கள்.

* அவருக்கு வேண்டிய வேலைகளை எளிதாக அமைத்துக் கொடுங்கள்.அவருடன் சேர்ந்து சிரியுங்கள்.அவரைப் பார்த்து ஒருபோதும் கேலி செய்ய வேண்டாம்.

* அவருக்கு நீங்கள் உதவுவது அவரது ஆற்றலில் சிறந்த முன்னேற்றத்தைக் கொண்டுவரும்.அவரால் செய்யக்கூடிய,அவருக்குப் பயிற்சயாக இருக்கக்கூடிய சில இலகுவான வேலைகளை அவருக்குக் கொடுக்க முடியும்.

* அவரது மூக்குக் கண்ணாடி சரியாக அணியப்பட்டுள்ளதா என்பதை உறுதி செய்து கொள்ளுங்கள்.

* மெதுவாகவும்,தெளிவாகவும் அவருடன் உரையாடுங்கள்.அவர் அதைப்புரிந்துகொள்ளவில்லையெனில் சாதாரண சொற்களையும்,குறுகிய வாக்கியங்களையும் உபயோகித்து அவருக்கு அதைத் தெளிவுபடுத்த முயற்சி செய்யுங்கள்.

*முடியுமானபோதெல்லாம் அவர்மீது அன்பும்,பரிவும் காட்டுங்கள்.ஒரு அன்பான வார்த்தை ஆயிரம் மாத்திரைகளைவிடப் பெறுமதியானது.

* ஞாபக சக்திக்கு உதவுகின்ற விடயங்களைப் பயன்படுத்துங்கள். உதாரணமாக குளியலறை,மலசல கூடத்திற்கான வழியை ஒரு அம்புக் குறியிட்டுக் குறித்துக் காட்டுங்கள். ஒவ்வொரு நாளும் அன்றைய திகதியை எழுதுகின்ற எழுது பலகையில் எழுதுங்கள்.

* தேவையற்ற மருந்துகளைத் தவிருங்கள்.

குளிப்பும்,தனி நபர் சுகாதாரமும்.
* சுதந்திரம், உதவியின்றி தன்னால் முடிந்தறவு சுயமாக காரியங்களைச் செய்வதற்கு அவரை ஊக்குவிக்கவும்.

* தன்மானம், குளிக்கும்போது அவரது மறைவிடத்தை கீழாடைகொண்டு அல்லது ஒரு துணியால் எப்போதும் மறைத்துக் கொள்ளுங்கள்.

* ஒரு ஒழுங்கு முறையில்மல,சலம் கழிக்கச் செய்ய உதவ வேண்டும்.

* கட்டிலில் ஓய்வாக இருக்கும் நேரப் பகுதியில் குடிபானங்களைக் குறைத்து வழங்குங்கள்.

* தேவையற்ற மருந்துகளைத் தவிருங்கள்.

குளிப்பும்,தனி நபர் சுகாதாரமும்.
* சுதந்திரம், உதவியின்றி தன்னால் முடிந்தறவு சுயமாக காரியங்களைச் செய்வதற்கு அவரை ஊக்குவிக்கவும்.

* தன்மானம், குளிக்கும்போது அவரது மறைவிடத்தை கீழாடைகொண்டு அல்லது ஒரு துணியால் எப்போதும் மறைத்துக் கொள்ளுங்கள்.

* ஒரு ஒழுங்கு முறையில் மல,சலம் கழிக்கச் செய்ய உதவ வேண்டும்.

* கட்டிலில் ஓய்வாக இருக்கும் நேரப் பகுதியில் குடிபானங்களைக் குறைத்து வழங்குங்கள்.

* இரவில் சிறுநீர் கழிப்பதற்காக கட்டிலின் கீழ் பொருத்தமான இடத்தில் பாத்திரத்தை வையுங்கள்.

*  கட்டுப்பாடற்று மல,சலம் கழிக்கும் பிரச்சினையுடைய முதியவர்களுக்கு பேட்ஸ்களைப் (DIAPER) பயன்படுத்துங்கள்.

உணவு உண்ணல்.
*  விரல்களை உபயோகித்து உண்ணக் கூடிய உணவுகளை வழங்குங்கள்.

* உணவுகளைச் சிறு,சிறு துண்டுகளாக வெட்டிப் பரிமாறுங்கள்.

* கூடுமானளவு சூடான உணவுகளைப் பரிமாற வேண்டும்.

* கொடுக்கப்பட்ட உணவை எவ்வாறு சாப்பிடுவதென்று அவருக்கு ஞாபகப்படுத்துங்கள். (கையைப் பாவித்து அல்லது உணவுத் தட்டில் எவ்வாறு சாப்பிடுவதென்று).

*  உணவை விழுங்குவதில் பிரச்சினைகள் இருப்பின் விசேட வைத்திய நிபுணரிடம் காட்டுங்கள்.

*  சாப்பிடக் கூடிய,தயார் நிலையிலுள்ள உணவைப் பரிமாறுங்கள்

*  வீட்டை விட்டு அலைந்து திரிதல்.

* அவரைக் கண்டு பிடிப்பதற்கு இலகுவாக ஒரு கைப்பட்டியையோ, அல்லது மாலையையோ,அல்லது நிறமான ஆடைகளையோ அணிந்திருக்கச் செய்யலாம்.

* காணாமற்போய்த் தேடிக் கண்டுபிடிக்கப்பட்ட போது உங்களது கோபத்தை அவரிடம் காட்ட வேண்டாம்.

அறளை பெயர்தலின் படிநிலைகள்.
01. ஆரம்ப நிலை (EARLY STAGE).

இந்நிலையில் ஒருவர் குழப்பத்திற்குட்பட்டிருப்பதோடு, சற்றுமுன் நிகழ்ந்த விடயங்களை மறந்து விடுபவராகத் தோன்றலாம்.கவனத்தைக் குவிப்பதிலும், முடிவெடுப்பதிலும் சிரமங்களைக் கொண்டிருப்பார்.தனது வழமையான செயற்பாடுகளில் பிடிப்பை இழந்து விடலாம்.பொதுவாகக் குடும்பத்தவர்களும்,சுகாதார உத்தியோகத்தர்களும் இவ்வாரம்ப நிலையை வயது முதிரும்போது ஏற்படுகின்ற சாதாரண நிலையெனக் கருதுகின்றனர்.

02. மத்திம நிலை.(INTERMEDIATE STAGE)
குழப்பம்,மாறாட்டம் ஞாபக மறதி,மனோநிலை மாற்றங்கள் என்பன மிகவும் தீவிரமாகக் காணப்படும்.
நடத்தைப் பிரச்சினைகள், உதாரணமாக- மூர்க்கப் போக்கு, மற்றும் பாலியல் பிரச்சினைகள் என்பன உருவாக முடியும்.அவ்வயோதிபர் வீட்டைவிட்டு வெளியில் அலைந்து திரியலாம். அவரது தாக்கம் பெரிதும் பாதிக்கப்படுவதுடன்,தன்னைத்தானே கவனித்துக்கொள்ளும் அவரது ஆற்றலும் பாதிக்கப்படலாம். சாதாரண விடயங்களைக் கூட (ஆடை அணிதல்) சுலபமாகச் செய்ய முடியாமல் போகலாம்.அவர் நாளாந்தம் சாதாரணமாக பிறருடன் பேசுபவற்றைப் பேசவும், புரிந்துகொள்ளவும் சிரமப்படலாம்.

03. பிந்திய அல்லது காலங்கடந்த நிலை.(LATE STAGE)
அவர் தனது உறவினர்கள், நண்பர்களை அறிந்துகொள்ளமாட்டார்.உடல் எடை குறைதல், இடைக்கிடை வலிப்பு ஏற்படுதல்.சிறுநீர்,மலம் கழிப்பதில் கட்டுப்பாட்டை இழத்தல் என்பன காணப்படலாம்.அவருடன் எந்தவித பொருள் பொதிந்த உரையாடல்களையும் மேற்கொள்வது பெரும்பாலும் சாத்தியமாகாது.அவர் எல்லா நேரமும் குழம்பிய நிலையிலேயே காணப்படலாம்.

குழம்பியுள்ள நடத்தையுள்ள ஒரு வயோதிபரைக் கையாளும் போது நினைவிற் கொள்ள வேண்டியவை.
01.ஒரு வயோதிபரில் தொந்தரவு மிக்க நடத்தைகள் வெளிப்பட அறளை பெயர்தல் (DEMETIA) உளமாய நோய் ( PSYCHOSIS) குழப்பம்/மாறாட்டம் (DELIRIUM) அல்லது மனச்சோர்வு (DEPRESSION) என்பன காரணங்களாக இருக்க முடியும். முதலில் மேற்கண்டவற்றை இனங்கண்டு அவற்றுக்குச் சிகிச்சை அளித்தல் வேண்டும்.

02. ALZHEIMER'S DISEASE அறளை பெயர்தல் ஏற்படத் தொடங்குகின்ற பொதுவான காரணியாகும். தற்போது இதனைக் குணப்படுத்துவதற்கு எந்தவித சிகிச்சையும் இல்லை.

03. நடைமுறை ஆலோசனைகள், உணர்வு ரீதியான ஆதரவு நடத்தைப் பிரச்சினைகளுக்கு உதவும் மருந்துகள் என்பன பராமரிப்புச் சுமையைக் குறைப்பதற்கு மிகச்சிறந்த வழிகளாகும்.

04. முதியோர்கள் பாவிக்கின்ற பல மருந்துகளின் அளவு இளவயதினருக்குப் பயன்படுத்துகின்ற மருந்தின் அளவைவிட கிட்டத்தட்ட  மூன்றிலொரு பகுதியிலிருந்து அரைவாசி வரையாகும்.அநாவசியமான மருந்துகளைத் தவிர்க்கவும்.

05. வைத்தியரின் ஆலோசனையின் படியே மருந்துகளைப் பாவிக்கவும்.

அனுப்பி வைத்தவர்: சிவ சிவபாதம் அவர்கள்


முதியோர் தினத்தில்..ஒரு பெரியவரின் ஆதங்கம்...

திரும்பிப்பார் மகனே..

அப்பா என கூப்பிட்ட நீ
இப்போ யாரப்பா என்கிறாய்...
உன் மனைவி வந்தபின்
யாரோ என பாக்கிறாய்..

வயிற்றில் சுமந்தாள் அன்னை,
அவளுக்கு வலிக்கவில்லை...
தோளில் தினம் சுமந்தேன்
எனக்கும் வலிக்கவில்லை...
என்னை நீ சுமக்கவில்லை..
இருந்தும் எனக்கு வலிக்குறது..

மாதாந்தம் பத்தாம் திகதி
தினம் வராதா சொல்வாயா..?
பத்தாயிரம் பென்சனுக்கு
எங்கிருந்து வருகிறது
திர்டீரென அன்பெல்லாம்..???

முதுமை வந்த பின்னல் என்
முகம் பார்த்தும் நீ உன்
முகம் திருப்பி போகையில்
துடிக்காத என் இதயமும்
நொடிக்கு இருதரம் துடிக்குதடா...

திரும்பிப்பார் மகனே..

சிறுவயதில் உன்
இரவு திருவிழாவை
ஒரு வயதில்
நான் கூற சிரித்திருக்கிறாய்...
ஒரு நாள் கட்டிலில்
போனதற்காய்
கடிந்து விழுந்தாய்..
உணர்வே இல்லாமல்
தான் போகுதடா
இது கூட புரியலையா...!!

திரும்பிப்பார் மகனே

ஆறு வயதில் ஒன்றை
அறுபதுதரம் கேட்டும்
சொல்லியிருக்கிறேன்..
ஆறு தரம் தான்
அன்பாய் கேட்டிருப்பேன்..
அறுபது வயது தான்
ஆகிறது..."உனக்கு
அறளை பேந்து விட்டது,
என்கிறாள்
உன் மனைவி..

உங்களுக்கு ஆடை
வாங்குகையில் எனக்கும்
ஒன்று வாங்குங்கள்..
குளிப்பது சிரமமாக
இருக்கிறது... அடிக்கடி
உடையையாவது
மாற்றிக்கொள்கிறேன்..

குழந்தைகள் கூட
நெருங்க மறுக்கிறாய்
முதுமை தொற்றிவிடும் என்றா?
திரும்பிப்பார் மகனே..
முன்பு எங்கள் வீட்டு
பூனையை அணைத்து
மகிழ்ந்திருக்கிறாய்
நினைவிருகிறதா...??

தொழுவத்தில்
மாடுகளுக்கு வைக்கும்
கஞ்சி கலராய் இருக்கிறது
தினம் தரும் தேநீரை விட..
சத்து உணவு கேக்கவில்லை
சாகடிக்க தந்தால் போதும்
செத்து விடுகிறேன்....
வங்கியில் காசிருக்கு..
காப்புறுதியும் செய்திருக்கு..
அது போதும் உனக்கு
சுடலை வரைக்கும்...

தமிழ் நிலா

”அன்னையும் பிதாவும் பின்னடிக்கு இடைஞ்சல்” வாசிக்க இங்கே அழுத்துக

 

 

 


பொசொன் போயா தினமும் பௌத்த மதமும் 12.06.2014

E-mail Print PDF


புத்தரபிரான் அவதரித்ததும், அவர் ஞானம் பெற்றதும், பரிநிர்வாணம் அடைந்ததும் வைகாசிமாத (போயா) பௌர்ணமி தினங்களிலே நிகழ்ந்துள்ளதாக பௌத்த சமய நூள்கள் கூறுகின்றன. இவ் சிறப்பு மிக்க வைகாசிமாத பூரணை தினத்தையே பௌத்த மதத்தினர் ”வெசாக் பண்டிகையாக” கொண்டாடுகின்றனர்.

அதேபோல் பெளத்த தர்மம் இலங்கைக்கு (முதல் முறையாக) அறிமுகம் செய்து வைக்கப்பெற்றதும் ஒரு பூரணை தினத்திலேயாகும். இந் நிகழ்வானது ஆனி மாத பூரணை தினத்திலேயே நிகழ்ந்துள்ளது. அதனால் இவ் பூரணை தினத்தையே ”பொசன்” பூரணை (போயா) தினமாக பௌத்த மதத்தினர் கொண்டாடுகின்றனர். அத் தினம் இவ் வருடம் 12.06.2014 அன்று அமைவதாக கணித்துள்ளனர். பூரணை தினத்தை புனித நாளாக இந்துசமயம் போற்றுவதுபோல் பௌத்த சமயமும் போற்றுகின்றது.

கபிலவஸ்து அருகிலுள்ள லும்பினிக் கிராமத்தில் கி.மு. 566-ல் சாக்கிய குலத்தில் கௌதம புத்தர் பிறந்தார் . அவருடைய தந்தை சுத்தோதனர். தாயார் மாயாதேவி. சாக்கிய குலத்தைச் சேர்ந்த சுத்தோதனர், கபிலவஸ்துவைத் தலைநகரமாகக் கொண்ட சாக்கிய நாட்டின் மன்னராவார். கபிலவஸ்து நேபாளத்தின் எல்லையில் அமைந்துள்ளது. பெற்றோர் அவருக்கு சித்தார்த்தர் என்று பெயரிட்டு அழைத்தனர்.

கி.மு. 328 ஆவது ஆண்டில் ஒரு பொசன் போயா தினத்தன்று இந்திய சாம்ராச்சியத்தின் சக்கரவர்த்தியாகிய அசோக சக்கரவர்த்தியின் மகள் துறவறம் பூண்ட இளவரசி சங்கமித்தை தேரர் தனது சகோதரனான இளவரசர் அரஹட் மஹிந்த தேரருடன் இலங்கைக்கு வந்து மிஹிந்தலை மலை உச்சியில் இலங்கையில் அரசாட்சி புரிந்து வந்த தேவநம்பியதீசன் மன்னனை சந்தித்த வரலாற்று முக்கியத்துவம் வாய்ந்த நிகழ்வு இடம்பெற்றது

கலிங்கப் போரில் தன்னை எதிர்த்துப் போராடிய எதிரிநாட்டு படைகளை போர் முனையில் படுதோல்வியடையச் செய்த சக்கரவர்த்தி அசோகன் அன்றிரவு போர்களத்திற்கு சென்று போரினால் ஏற்பட்ட இழப்புக்களை கண்காணித்துக் கொண்டிருந்த போது; போர் வீரர்கள் பலர் அங்கவீனர்களாகவும் குற்றுயிராயும் அவஸ்த்தைப்படுவதையும், ஒரு வயோதிப் பெண் ஒரு இளம் போர் வீரரின் சடலத்தை தனது மடியில் வைத்து கண்ணீர்விட்டு அழுதுக் கொண்டிருந்த காட்சியையும் பார்த்து மனம் நெகிழ்ந்து போன அசோக சக்கரவர்த்தி, குனிந்து அந்தப் பெண்ணிடம், ஏன் அம்மா அழுகிறீர்கள்? என்று கருணையுடன் கேட்டிருக்கிறார்.

அப்போது, போர் முனையில் எங்கள் நாட்டை ஆக்கிரமித்த வெளிநாட்டுப் படைகள் எனது மகனை கொன்றுவிட்டார்கள் என்று தெரிவித்த அந்த வயோதிப மாது நீங்கள் யார் என்று அசோக  சக்கரவர்த்தியிடம் கேட்டிருக்கிறார்.

அதற்கு பதிலளித்த சக்கரவர்த்தி நான் தான் ”சாம்ராட் அசோக சக்கரவர்த்தி” என்று பதிலளித்தவுடன் வேங்கையைப் போன்று கொதித்தெழுந்த அந்த வயோதிப மாது, நீ ஒரு சக்கரவர்த்தி அல்ல. அப்பாவி உயிர்களை பலியெடுக்கும் மிருகமென்று கத்தி அழுது கொண்டே மயக்கமடைந்தார்.

இந்த சம்பவங்களினால் மனம் நொந்துபோன அசோக சக்கரவர்த்தி செய்வதறியாது இத்தனை உயிர்களை பலிகொண்டு கலிங்கப் போரில் நான் அடைந்த வெற்றியினால் எதனை சாதிக்கப்போகிறேன் என்று நிலை தடுமாறி வேதனையில் மூழ்கியிருந்த போது அவருக்கு போதி மரத்து மாதவன் புத்தபெருமானின் நற்போதனைகளின் உண்மைத் தத்துவத்தை புரிந்து கொள்வதற்கான ஒரு வாய்ப்பு கிடைத்தது.

அன்று முதல் அசோக சக்கரவர்த்தியின் வாழ்க்கை தலைகீழாக மாறிவிட்டது. யுத்தம், இரத்தகளரி, கொலை போன்ற தீய எண்ணங்களை அடியோடு துறந்துவிட்ட அசோக சக்கரவர்த்தி பெளத்த மதத்தை தழுவி பெளத்த மதத்தின் நற்போதனைகளை பரப்பும் பணியை ஆரம்பித்தார்.

இதனைத் தொடர்ந்து அரச குடும்பமே பெளத்த மதத்தைத் தழுவிக்கொண்டது. உடனடியாகவே மகன் மஹிந்தையையும் மகள் சங்கமித்தையையும் புத்த சமயத்தைப் பரப்பும் பணியில் ஈடுபடுத்தினார். இந்த பெளத்த தர்மத்தை போதிக்கும் பணிக்கு தனது மகன் இளவரசர் மஹிந்தவையும், மகள் இளவரசி சங்கமித்தையையும் சக்கரவர்த்தி தேர்ந்தெடுத்தார்.

பின்னர் காவி உடையணிந்து பெளத்த தர்மத்தை உலகத்திற்கு பரப்பும் பணிக்காக துறவறம் பூண்ட அரஹட் மஹிந்த இலங்கைக்கு வந்து மன்னன் தேவநம்பிய தீசனை சந்திக்கச் சென்ற போது, மன்னன் மிஹிந்தலை மலை உச்சியில் மான் வேட்டையாடிக் கொண்டிருப்பதை அவதானித்தனர்.

தேவநம்பிய தீச மன்னனை அணுகிய இவ்விரு துறவிகளும் பெளத்த தம்மத்தை அவரிடம் போதித்து, கருணாமூர்த்தி புத்த பெருமானின் போதனைக்கு அமைய கருணையுள்ளம் கொண்ட வாழ்க்கையை நடத்த வேண்டுமென்று போதனை செய்தனர். இவர்களின் இந்த பெளத்த போதனையை கேட்டு மனம்மாறிய தேவநம்பியதீச மன்னன் மிருகங்களை வேட்டையாடுவதை அடியோடு விட்டு பெளத்த தர்மத்தை தனது பல்லாயிரக்கணக்கான மக்கள் சகிதம் ஏற்றுக் கொண்டார்.

இந்த நிகழ்வே இலங்கையில் பெளத்த தர்மம் தழைத் தோங்குவதற்கான ஆரம்பமாகும். அசோக சக்கரவர்த்தி இலங்கைக்கு போதனை செய்த பெளத்த தம்மம் சீனா, ஜப்பான், தூரகிழக்கு நாடுகள் உட்பட பல நாடுகளுக்கும் பரவிய போதும் இலங்கையில் தான் பெளத்த தர்ம்ம் வலுவாக நிலை கொண்டது. இதனையடுத்து இலங்கையை ஆட்சி செய்த மன்னர்கள் அனைவரும் பெளத்த விகாரைகளையும், பெளத்த தூபிகளையும் நாடெங்கிலும் நிர்மாணித்தனர்.

மிஹிந்தலை மலையில் முதன் முதலில் தேவநம்பியதீச அரசனை சந்தித்த அரஹட் மஹிந்த தேரர் பெளத்த தர்மத்தின் தத்துவத்தை அவர் புரிந்து கொண்டிருக்கிறாரா, அவரின் அறிவின் தரத்தை அறிந்து கொள்வதற்கும் பல கேள்விகளை எழுப்பினார். நாம் உண்மைத் தத்துவத்தை உலகத்திற்கு உபதேசித்த ஒரு பெரியாரின் நாட்டிலிருந்து இங்கு வந்திருக்கிறோம் என்று கூறி பெளத்த தர்மத்தை போதித்த போது அதனை தேவநம்பியதீச மன்னன் ஏற்றுக் கொண்டு அன்றிலிருந்து பெளத்த தர்மத்துக்கு அமைய தன்னுடைய மற்றும் நாட்டு மக்களுடைய வாழ்க்கையை மாற்றியமைத்தார்.

அந்த சம்பவத்தினால் பெளத்த தர்மத்தின் மீது நம்பிக்கை கொண்ட அரச குடும்பத்தைச் சேர்ந்த நூற்றுக்கணக்கானோர் இலங்கையில் துறவறம் பூண்டு நாடெங்கிலும் பெளத்த தர்மத்தை பரப்பினர். இந்த நிகழ்வு இலங்கையில் கலாசார மாற்றமொன்றை ஏற்படுத்துவதற்கு வழிகோலியது.

அசோக சக்கரவர்த்தியின் மகள் சங்கமித்தை தேரர் இலங்கைக்கு வந்தபோது கொண்டு வந்த புத்த பெருமான் புனிதத்துவம் அடைந்த அரச மரத்தின் கிளையொன்றை அனுராதபுரத்தில் நாட்டி இலங்கையில் புத்த சமயம் அறிமுகப்படுதப்பெற்றமையை  நினைைவு கூர்ந்தனர். இந்தக் கிளை இன்று ஒரு பெரிய விருட்சமாக மாறி ”ஸ்ரீமாபோதி” என்ற பெளத்த புனிதத் தலங்களில் பிரதான நிலைக்கு வந்துள்ளது. பெளத்த தர்மம் இலங்கைக்கு அறிமுகமாகிய பொசன் போயா தினம் புதியதோர் கலாசாரத்தையும் அமைதியான வாழ்க்கையையும் அமைத்துக் கொள்வதற்கு மக்களுக்கு ஒரு சிறந்த அடித்தளமாக அமைந்துள்ளது.

போதிமாவனின் வாழ்கை வரலாற்றை அறிந்துகொள்ள இங்கே அழுத்துக

வெசாக் பண்டிகை பற்றி அறிந்து கொள்ள இங்கே அழுத்துக

 


 

 

 

 

 

 


  • «
  •  Start 
  •  Prev 
  •  1 
  •  2 
  •  3 
  •  4 
  •  5 
  •  6 
  •  7 
  •  8 
  •  9 
  •  10 
  •  Next 
  •  End 
  • »

Page 1 of 24